EPP- HE 5 PANGANGALAGA SA SARILING KASUOTAN

1. Pagbukud-bukurin ang mga puti at may kulay na damit.

Pagbukud-bukurin ang mga damit. Ihiwalay ang mga puti sa may kulay, may   maruming-marumi sa di gaanong marumi at ang mga damit na may mantsa o dapat kumpunihin. Sulsihan muna ang mga sirang damit at alisin muna ang mantsa bago labhan.

2. Ibabad sa tubig ang mga damit.

Ibabad sa tubig ang mga damit na lalabhan upang lumambot ang pagkakapit ng dumi. Unahin ang mga puti at di-gaanong marurumi, bago ang may kulay at maruming-marumi. Sundin ang ganitong pagkakasunud-sunod hanggang sa matapos.

3. Sabunin ang damit.

Sabunin ang mga damit. Kusuting mabuti ang mga bahaging karaniwang kinakapitan ng dumi tulad ng kuwelyo, manggas, likod at laylayan.

4. Ikula ang mga puti.

Ikula sa araw ang nasabunang mga puti. Manaka-nakang wisikan ng tubig na may sabon ang nakakula upang huwag matuyo.

5. Banlawan ang damit upang luminis.

Banlawan ng tatlong beses ang mga damit na may kulay hanggang maalis lahat ang bakas ng sabon. Isampay ang mga ito sa malilim na lugar upang hindi kumupas ang mga kulay nito.

6. Ikula ang mga puti at isampay ang mga damit nang maayos.

Matapos ikula ang mga putting damit, banlawan ang mga ito nang ilang ulit hanggang maalis ang bakas ng sabon. Isampay ang mga puti sa maaraw na lugar upang lalong pumuti.