Unsur Intrinsik Kriasastra

A. Wirasa/Pengresep

Yéning ngwacén kria sastra, pacang metu pangresep, ngresepin daging susastra sané kawacén. Sang sané ngwacén pinaka konsumen, ngicénin panampen ring pikayunan pangawi sajeroning kria sastra punika. Pikolihé ngwacén kria sastra sané katampėnin marupa unteng daging wacénan sané ketah kabaos unsur intrinsik Unsur-unsur intrinsik kria sastra, luiripun: (1) tema, (2) tokoh miwah penokohan, (3) amanat utawi piteket, (4) alur crita, miwah (5) latar crita.

1) Tema

Téma tegesipun unteng daging pikayunan utawi idé pokok, gagasan, khayalan, sané kawedar antuk pangawi ring reriptannyané. Biasané, tema puniki maiketan ring amanat, duaning reriptan kria sastra matetujon pinaka tuntunan ring parajana sané ngwacén kria sastra punika.

​2) Tokoh miwah Penokohan

Tokoh mateges sang sané kaceritayang ring kria sastra, inggian marupa jadma (manusia) utawi buron (binatang). Tokoh-tokoh punika maderbé gegaduhan, bikas, utawi karakter suang-suang. Karakter tokoh-tokoh cerita kabaos penokohan. Punika sané mawinan wénten (1) tokoh protagonis (tokoh sané mabudi sadu, baik), (2) tokoh antagonis (tokoh sané nungkasin kabecikan), saha (3) tokoh pembantu (penegep).

3) Amanat/Piteket

Amanat pateh ring pesan, petuah utawi piteket, pekeling, tuntunan sané kasisipin ring kria sastra mangda prasida pinaka gegamelan utawi sepat siku-siku maparilaksana ring jagaté. Puniki becik pisan duaning kria sastra maderbé wiguna ngibur (panglilalacita), edukatif (ngajahin), miwah panyobyah (peyampai informasi).

4) Latar/Setting

Latar utawi seting, istilah kria sastra sané mateges genah utawi galah. Ring dija kriasastra punika kaceritayang. Napi ké nyeritayang kahuripan ring kota, ring desa, ring pegunungan, utawi tiosan. Taler ri kala asapunapi ceritan kriasastra punika kaceritayang, napi ké cerita punika duk pamadegan Dalem Waturenggong, duk perang puputan margarana, ri kala wengi, utawi ri kala semeng.

5) Alur Cerita

Alur cerita sajeroning kria sastra sering kanggén panegep seseleh utawi analisis. Asapunapi penceritaan utawi tata sulur nyatwayang cerita punika? Napi aurné datar utawi biasa kémanten, napi ké akéh madaging konflik utawi ketegangan, sapunapi taler pamuputnyané?