Bahasa Banjar

PANGANTIN ADAT BANJAR​

​

PANGANTIN ADAT BANJAR

​

Urang Banjar Bakakawinan, kabiasaannya wayah bulan Mulut atawa Rabi’ul Awal. Ujar urang tu maambil barakatnya wayah bulan Nabi Muhammad S.A.W diranakakan. Apalagi amun di Hulu Sungai biasanya imbah katam jadi baras kada manukar lagi.

​

Urang Banjar nang anum, Lalakian atawa Bibinian amun umurnya sudah sasadangnya, balalu sadang gasan dikawinakan. Nang pamulaan dahulu, bubuhan lalakiannya  “ basasuluh “ mancari bakal bibiniannya amun inya sudah cucuk taparukui sakulawarga, balalu “ badatang “

atawa  “ bapara “

​

​

​Apabila Badatang sudah ditarima ulih  bubuhan bibiniannya,maka diadakan acara “ Baninikahan.” Wayah baninikahan nitu ada jua nang salajur  “ Baatar Patalian “, nitu maksudnya mambari-i bibiniannya sagala macam tapih baju lawan pamupuran saraba sabuting.

​

​

Kainanya ditantuakan ari wayah pangantin batatai, disambat “ duduk gawinya “.  Sahari balum duduk gawi nangitu, pangatin lalakian atawa pangantin bibinian lalu” Batimung ” tarus “Bamandi – mandi.” Bamandi - mandi pangantin nitu ada jua nang manyambat “Badudus” atawa “ Bapapai “. Imbah bamandi - mandi lalu

“ batapung tawar “, basalamatan nang pupulurannya bubur habang bubur putih wajik, cucur,cincin ,lawan pisang mahuli.

​

Taadat jua pulang  diadaakan acara “batamat Qur’an “ nang diatur ulih guru mengaji.Wayah batamat Qur’an nitu disadiaakan nasi lakatan kuning nang kaya gugunungan halus, wajik, hintalu dadar nang dihiris – hiris, hintalu itik masak. Pangantin nang mangaji nitu dipayungi lawan payung kambang.