​Lesskilningur - refur

Refurinn er spendýr og rándýr. Refurinn var eina landspendýrið sem landnámsmenn fundu þegar þeir komu til Íslands. Hingað hefur hann líklega komið með hafís frá Grænlandi.

Refurinn er af hundaætt. Hann er skyldur hundum og úlfum. Hann er því frekar líkur hundi í útliti, en miklu minni. Refurinn er 3-4 kg og um 90 cm frá trýni og aftur að skottbrodd. En skottið sjálft er 30 cm langt og mjög þykkt. Þegar refurinn sefur hringar hann skottið yfir leggi sína og trýni til að hlýja sér. 

Refurinn er á ferðinni 12-14 klukkutíma á sólarhring, einkum í ljósaskiptunum (þegar byrjað er að rökkva). 

Refurinn er sérhæfð smádýra- og fuglaæta en þó kemur fyrir að refur drepi lömb. Slíkur refur er kallaður dýrbítur. Nú á dögum eru dýrbítar sjaldgæfir. Grenjaskyttur veiða refi á sumrin til að koma í veg fyrir að þeir drepi lömb. Veiðarnar eru kallaðar grenjavinnsla. Refir eru líka veiddir á veturna. 

​Lesskilningur - refur frh.

​

Þegar refur ætlar að koma upp fjölskyldu þá helgar hann sér svæði og lokkar svo til sín maka. Hann merkir svæðið sitt með þvagi sínu. Þetta umráðasvæði er óðal hans og bæði læðan og steggurinn hjálpast að við að verja það fyrir öðrum refum. Afkvæmi refs kallast yrðlingur eða hvolpur og tófan gýtur í greni (greni er hola eða gjóta).