Bahasa Jawa Kelas VII

Saksurude praja Majapahit, kraton Demak Bintara sangsaya kuncara. Raden Patah minangka rajagung binathara anggone ngasta pusaraning praja sinurung dening para wali cacah sanga kang katelah Wali Sanga. 

Nalika samana para wali nganakake prepatan. Wosing tembung bakal ngedegake masjid, saben wali kapasrahan ngupadi kayu jati siji-siji minangka saka gurune masjid lan bakalan liyane.

Sunan Giri anggone ngupadi kayu mangidul. Sadalan-dalan Kanjeng Sunan tansah ngagungake asma Gusti amrih kasembadaning karsa. Keseling sarira ora rinasa, kang kaesthi mung antuka kayu jati pilihan kang sarwa bregas sakabehe. Tekan ing sawijining alas kang akeh wit jatine. Kanjeng Sunan nandukake puja-puji syukur konjuk ngarsa Dalem Gusti Kang Akarya Jagad.

Kayu-kayu Jati ing alas iki kabeh bregas. Kanjeng Sunan pitaya kayu-kayu iki ana kang nandur. Kanjeng Sunan banjur ngubengi alas nggoleki kang nandur. Ing alas kono ana gubug, banjur dicedhaki. Kanjeng Sunan uluk salam banjur mlebu. Kang kagungan gubug iku asmane Kyai Danasri. Sawise tetepungan, Kanjeng Sunan mrasajakake kersane. Kyai Danasri ngetokake dhawuhe Kanjeng Sunan. Kayu Jati kang wis ditegor banjur dikelekake ing Bengawan Solo kang iline tumuju tekan Demak Bintara.

Sadurunge ninggalake papan kono, Kanjeng Sunan paring tetenger, papan kono iku aran Alas Danalaya kang tegese dana iku paweweh lan laya mengku werdi lelana utawa lungan. Sarehne papan sakupenge alas Danalaya, alas lan gunung. Mula minangka pangeling-eling, papan kono iku ingaran Wonogiri. Wana tembung ngokone alas lan giri tembung liyane gunung.